Дидие Дрогба во договор за интер

Дрогба од лето во Интер

Италијанските медиуми објавија сензационална информација, според која Дидие Дрогба по завршувањето на сезонава ќе се пресели во редовите на Интер.
Репрезентативецот на Брегот на Слоновата Коска не крие дека е несреќен во Челзи, особено по заминувањето на Жозе Мурињо, и веќе во неколку наврати објави дека планира да ги смени клупските бои во текот на летниот преоден рок.
Иако досега Дрогба најчесто беше поврзуван со трансфер во редовите на Милан, последните информации говорат дека Интер е клубот што се наоѓа во пол-позиција во трката по овој фудбалер. Имено, Масимо Морати е воодушевен од квалитетите на Дрогба и најавил дека нема да жали пари за да го доведе најдобриот стрелец на Челзи на „Џузепе Меаца“.
Весникот „Кориере дело спорт“ објави дека Морати веќе имал средба со агентот на Дрогба, на којашто биле договорени скоро сите детали од договорот што фудбалерот ќе го потпише со Интер. Токму поради ова Дрогба веќе им соопштил на своите најблиски пријатели дека својата кариера ќе ја продолжи во дресот на „нероаѕурите“, тим со којшто се надева дека ќе успее да дојде до многу посакуваниот трофеј во Лигата на шампионите. Интер е подготвен да му плати на Челзи 23 милиони евра за услугите на Дрогба, сума што „сините“ потоа ќе ја искористат за ангажман на нов напаѓач (се шпекулира со имињата Давид Вилја и Марио Гомез).
Преселбата на Дрогба во Интер ги подгреа и шпекулациите дека Жозе Мурињо летово ќе се пресели на кормилото на италијанскиот првак. Мурињо и Дрогба имаа фантастична соработка во Челзи, и Масимо Морати се надева дека ќе успее да ги обедини и во Интер.